1 Kings 19
1 以利亞所做个每一件事㧯佢樣般用刀仔㓾死所有巴力先知个事，亞哈王將全部㧯厥𡜵娘耶洗碧講。
2 耶洗碧就派使者去見以利亞，講：「天光日這時，𠊎若無像你對待該兜先知个性命恁樣對付你，願神明重重責罰𠊎！」
3 以利亞嚇倒，就䟘起來逃命，帶等佢个僕人到猶大个別是巴去。以利亞將僕人留在該位，
4 自家在曠野行一日个路程，來到一頭杜松樹下，坐在該位求死；佢祈禱講：「上主啊，罅擺了！將𠊎个性命收轉去好哪！因為𠊎無比𠊎个祖先較會。」
5 佢睡在樹下，睡掉了。忽然間，有一個天使來拍佢，對佢講：「好䟘了，來食兜東西！」
6 佢擘開目珠一看，看到在頭那堘頭有用火炭焙好个餅㧯一罐水。佢就拿來啉食，然後又橫轉去睡。
7 上主个天使第二擺來拍佢，講：「好䟘了！來食兜東西，你愛行个路還當遠！」
8 以利亞就䟘起來，拿來食，拿來啉。食物給佢盡有元氣，行四十日夜，到上帝个山，就係何烈山。
9 在該位，佢入去一隻山窿過夜。忽然，上主對佢講話：「以利亞，你在這位做麼介？」
10 以利亞應講：「上主—萬軍个元帥上帝啊，𠊎為你大發熱心。總係以色列人民違悖你㧯佢等立个約，拆掉你个祭壇，又㓾掉你所有个先知。這下只有賸𠊎一個人，佢等還係愛尋𠊎，收𠊎个命！」
11 上主對佢講：「出去企在山頂，企在𠊎个面前。」該時，上主對該位經過，忽然間強風使山崩石裂，總係上主無在風中。風吹過，接等有地動，總係上主也無在地動中。
12 地動後有火，總係上主也無在火中。火以後，有微細个聲。
13 以利亞聽到，就用外衫揞等面，出去企在窿口。有一個聲音對佢講：「以利亞，你在這位做麼介？」
14 佢應講：「上主—萬軍个元帥上帝啊，𠊎為你大發熱心。總係以色列人民違悖你㧯佢等立个約，拆掉你个祭壇，又㓾掉你所有个先知。這下只有賸𠊎一個人，佢等還係愛尋𠊎，收𠊎个命！」
15 上主講：「你對原來个路轉到大馬士革附近个曠野去，然後入城去膏油設立哈薛做敘利亞王，
16 膏油設立寧示个孫仔耶戶做以色列王，又膏油設立亞伯‧米何拉人沙法个孻仔以利沙接你做先知。
17 閃得開哈薛刀仔个人，就會被耶戶㓾死；閃得開耶戶刀仔个人，就會被以利沙㓾死。
18 總係𠊎愛在以色列中留下七千人；這兜人毋識向巴力跪拜，也毋識唚過佢。」
19 以利亞離開該位，尋到沙法个孻仔以利沙。以利沙堵堵好在耕田；有十二對牛在佢頭前，佢駛等最後一對。以利亞脫下外衫，袈在以利沙身上。
20 以利沙就離開佢个牛，去逐以利亞，講：「等𠊎先㧯爺𡟓辭別，然後𠊎正來跈你。」以利亞講：「好，你轉去。𠊎無阻擋你！」
21 以利沙就轉去，將佢个一對牛㓾掉，將牛軛拿來做柴燒，將牛肉煮給大家食；然後以利沙去跈以利亞，服事佢。